صغيرة سن وهمومي كبيره .. كبيرة هم وكثيرة أماني

Jĕ Jĕ · 10-22-2008, 06:34 AM

يعيش الحاضر بماضي زماني
وأعيش بغمرة احزاني .. واعاني

همومي تستغيث القلب مني
وقلبي صار في صدري أناني

انا مدري حياتي وش بلاها
ولاأدري يا حياتي وش بلاني

يذوب الشوق في داخل وريدي
ومن كاس الوله شوقي سقاني

يغيب السعد عن دنيا وجودي
وحزني للبكا دايم دعاني

وحولي ناس تبكي من دموعي
عساني ما أنحرم منهم عساني

تشاركني وجع قلبي وهمي
ولا ودي اعذبهم عشاني

غريبه دنيتي وش عاد فيها
ثوانيها تضيع من الثواني

صغيرة سن وهمومي كبيره
كبيرة هم وكثيرة أماني

وحيده بين أحبابي وناسي
غريبه وسط ذاتي ما أراني

بموت بحيرتي ماأحد فهمني
ولاني فاهمه نفسي ولاني

ولاأدري وين تاخذني همومي
ولاأعرف وين يسكني مكاني

ألا يالله ياعالم بحالي
عليم بكل شي خافي خفاني

تنور لي طريقي يا إلاهي
وتغفر زلتي وعثرة لساني

وانا مهما اقترفت من الخطايا
ذنوبي عند عفوك ماتباني

الا يالله والماضي تركني
وانا أحيا مع ماضي زماني

اقلب صفحة الذكرى ليالي
ويقتلني الوله والشوق جاني

كتبت ابيات وتشكيني حروفي
ومهما جيت اعبر ما مداني

تزاحمني حروفي وسط صدري
يضيع الحرف وتذوب المعاني

كتبت البعض منها في قصيدي
ولو ودي اكمل ما كفاني

نهايتها تعود من البدايه
واعيش الحاضر بماضي زماني

وفيّه والوفا هو طبع فيني
وربي ما نسيت اللي نساني